website-icon

本地波經

環球球壇

業餘足球

球會選拔

更多

約踢波平台

本地波經

環球球壇

業餘足球

球會選拔

青年軍選拔

女足選拔

買物情報

搵腳專欄

搵腳指南

最新文章

熱刺前鋒孫興慜今季意外地以23個入球與利物浦前鋒沙拿並列成為21至22球季英超神射手,成功成為首個贏得此獎項嘅亞洲人。等我哋一齊回顧下呢位(祖籍山東?😂)韓國總統都讚好嘅亞洲球王今季嘅數據同表現啦! 名副其實嘅神射手 「兒子」孫興慜雖然同利物浦前鋒沙拿同樣地以23球並列射手榜,但係「兒子」並非熱刺嘅十二碼劊子手,哩23球入面冇一球屬於十二碼入球。相反地,利物浦嘅沙拿則有5球入球為十二碼。由呢個數據嚟睇,似乎冇十二碼入球嘅「孫仔」的金靴獎含金量似乎更比沙拿高少少咁。 以前成日聽到球迷評某啲球員淨係識用十二碼「刷入球數」,孫興慜今次居然以0個十二碼入球嘅方法取得神射手,真係可以話係實至名歸。 高效入球轉化率成關鍵 孫興慜效力嘅熱刺今季表現未算穩定,經常出現「海鮮波」,並未能為呢位南韓前鋒創造太多嘅機會。根據外國網站統計,今季孫興慜嘅xG (excepted goal)*值總和為16.99,但係佢嘅實際入球數字(23球)卻遠遠超過佢嘅xG 6球之多。 另外,孫興慜今季總共起腳86次,入球換率高達26.7%。相比其他射手榜競爭對手,沙拿的16.5%及C朗拿度的16.3%,孫仔係呢方面嘅數據可以話係相當出眾。 由此可見,強大嘅把握力係令到孫興慜可以係供應唔多嘅情況下成為英超神射手嘅關鍵因素。 左右開弓防不勝防 係孫興慜今季的23個入球入面,左右腳嘅入球分布意外嘅平均。當中12個入球來自左腳,另外11個入球則來自右腳。雖然孫興慜左右腳均可射門並唔係啲咩新鮮事,如此平均嘅左右腳入球數據亦非常罕見。「零逆足」亦都成為左呢位南韓前鋒爭取「士哥」的最強武器。 面對強隊亦都唔會啞火 有啲前鋒平時對弱隊會有入好多波,但係一面對強隊嗰陣就會俾人凍結冇辦法取得入球。孫興慜絕對唔係佢哋嘅一份子,佢係今季面對英超頭三球隊嘅大戰上陣五次,並成功為熱刺取得3個入球。面對強隊都可以交出如此出色數據,難怪可以成為英超神射手! 天生體格未及「鬼佬」都可以好好波 孫興慜今次成功拎到英超神射手完美證明咗即使亞洲人天生體格未必有歐洲人或非洲人強壯,亦都可以憑着後天嘅努力克服先天嘅劣勢。 以前筆者踢學界面對國際學校時,成日會聽到一啲隊友話「人哋啲鬼佬高我哋成個頭,又大隻,點踢喎,輸緊啦」希望孫興慜奪英超神射手呢件事可以啟發到香港嘅年輕球員,只要肯努力,其實「鬼佬」都冇咩好怕㗎咋,共勉之。

數據拆解孫興慜 憑咩成為首位奪英超神射手的亞洲人

香港球隊傑志於本年三月公佈落實於2022-23球季起,參與著名西班牙教練甘巴爾統籌的「全球青年精英足球計劃」,他們會被安排到西班牙安普斯特市(Amposta)的依比利高水平體育中心(Terres de l'Ebre Sports High Performance Centre)接受特訓。爭取西班牙球隊青睞,從而踏上效力其他聯賽的道路。期望在這計劃開始後,能幫助更多有潛力及能力的本地球員效力更高水平的聯賽。 香港外流球員過於集中於中國聯賽 近年很少可以看到本地球員外流到中國以外的聯賽效力,中甲中超成為外流球員主要效力聯賽。現時曾入選港隊外流的香港球員分別有7名,當中目前效力中國聯賽球隊的球員高達6名,包括效力中超球隊廣州城的陳俊樂,浙江FC的梁諾恆及梅州客家的勞烈斯。中甲球隊有南通支雲的李毅凱,廣西平果哈嘹的辛祖和四川九牛的羅素。惟仍未有只有歐陽耀沖效力日本J3的YSCC橫濱。 中國球隊阻礙香港球員代表港隊屢見不鮮 每當提及香港球員到中國聯賽效力,必定要講到吳偉超,他職業生涯的過程中分別效力了6年中超以及7年中甲,可算是一個成功的職業生涯。但要說到他足球生涯上的一段爭議,必定為2006年,吳偉超宣佈因為頭部受傷接受手術而退出港隊對烏茲別克的賽事,卻在上海申花對傑志的友賽中正選披甲而被球迷狂噓。到近年吳偉超在接受其他媒體訪問時說:「人在江湖身不由己,當時自己都決定不了踢哪一隊。」可見外流中國港將在選擇代表港隊時會受到球會阻撓。 事隔十六年,中國球會仍再次拒絕外流港將入選香港代表隊,先以疫情理由及隔離時間拒絕球員參與上年六月於巴林舉行的世界盃外圍賽第二圈賽事。到了今年五月,中國球會再以「疫情」為由,向球員施壓拒絕外流港將代表港隊。港隊教練安達臣在周二(10日)早上港隊操練過後的記者會透露分別收到三間中國球會發出的信件,指陣中港將不會為港隊出賽。安達臣指出:「我認為係球會向球員施壓,叫佢哋唔好代表港隊,因為回到中國要經歷4周隔離,係冇可能成事。」 中超將於2022年6月開鑼,屆時假若外流中港將代表港隊參與亞洲杯外圍賽,最快亦要6月15號返回中國再經歷28天隔離,7月13號才能歸隊操練。 假若未來再有更多球員因為效力中國聯賽球隊而被球會方面施壓,阻撓他代表港隊,港隊實力必定大打折扣。 中國聯賽並非香港球員唯一選擇 香港球員近年其實一直都有外流至其他外國聯賽的機會,例如早於2014年「子彈」夏志明就曾經被巴拉圭老牌勁旅瓜蘭尼睇中並誠意邀請他到巴拉圭落班。另外前傑志中場林嘉緯亦曾經泰超武里南邀請加盟。由此可見香港球員並不缺乏外流他國聯賽的機會。 球員外流係香港足球進步及發展的關鍵 除此之外,香港聯賽球隊財力不穩,近年港超聯有多支球隊因財政壓力先後自降及解散,分別有2016年自行降班的南華,2020年解散的富力R&F和自行降班的大埔足球會,2021年自行降班的愉園及飛馬。球員要追求進步,必須以外流為主要途徑,爭取在更高水平聯賽上陣,吸收經驗,增強港隊實力。 以日本足球為例,作為亞洲頂尖水平球隊,代表隊內大部分球員都為旅外球員,例如南野拓實,岡崎慎司,鈴木武藏等。由此,香港足球要進步,香港足總及本地球會應幫助球員旅外吸收其他地區高水平訓練及經驗,長遠下去,香港足球發展及實力才會更好。

中國球會屢次阻撓球員代表港隊 中國聯賽是否香港球員唯一選擇
和富大埔升班確定下季踢港超 南華元朗則表示時候未到

前港超區隊和富大埔率先確認會升班啊!和富大埔秘書長陳平表示基本上肯定球隊來季將會接受足總邀請升上港超聯,成為首支確定來季港超聯的首支新血!至於南華和佳聯元朗來季將繼續出戰港甲。

港足亞盃外泰國集訓冇輸過 六月一日鬥馬拉有直播

目前於泰國進行集訓的香港隊,於日前已經完成了三場熱身賽,當中港隊更加取得一勝二和的不錯成績。港隊稍後將會前往吉隆坡並於六月一日與馬來西亞進行友誼賽,屆時比賽將有直播。

香港電台宣布成功購入港隊亞盃外直播權 三場波均會免費直播

香港電台於今日(24日)宣布成功購得香港足球代表隊三場亞洲盃外圍賽賽事的獨家直播權!屆時港台將會透過港台電視31進行直播,想為為港隊打氣嘅各位球迷記得mark 實以下比賽日子同時間喇! 第一場 對手:阿富汗 日期:6月8日(星期三) 時間:7:25pm 第二場 對手:柬埔寨 日期: 6月11日(星期六) 時間: 7:25pm 第三場 對手:印度 日期: 6月14日(星期二) 時間: 10:55pm 香港足球代表隊目前正於泰國進行集訓,之後將會飛往馬來西亞與前港隊主教練金判坤帶領的馬來西亞進行友賽。

足總公布東亞盃25人集訓名單 球隊將於五月三十日開操

為咗迎接即將來臨的「EAFF E-1 東亞足球錦標賽」,足總於今日(23日)公布了25人集訓名單中,當中絕大部份球員來自香港U23。集訓名單如下: 守門員 顏翺天、龐焯熙 (香港U23)、伍瑋謙 (冠忠南區) 後衛 陳潤潼、黃浩然 (香港U23)、張譽倫、嚴啟倬 (傑志)、陳凱柏 (冠忠南區)、翁煦濤 (理文)、楊憲樂 (晉峰)、李俊諺 (南華) 中場 周家樂、黎培基、鄧筵霑、黃智康 (香港U23)、鄭展龍、趙聡悟 (傑志)、劉君正 (晉峰) 前鋒 鄭子森、楊迪麟 (標準流浪)、林樂賢、李藹軒、吳文希、袁世傑 (香港U23)、陳傲軒 (傑志 球隊將於5月30至6月14日期間在將軍澳足球訓練中心集訓。2022年「EAFF E-1 東亞足球錦標賽」由於原主辦國中國棄辦,賽事將會移師至日本茨城縣及愛知縣舉行。是次賽事將於7月19至27日舉行,由日本、南韓、中國、香港4支球隊競逐,當中日本南韓及中國均傳會以U23青年軍出賽。

英超利物浦宣布從富咸簽入19歲前鋒法比奧卡華路

英超球隊利物浦於昨日(23日)宣布從富咸免費簽入年僅19歲的英格蘭新星法比奧卡華路(Fabio Carvalho),雙方將會簽約五年。利物浦早於上年冬季嘗試向富咸引入呢位19歲的前鋒,可惜失敗收場,如今終於正式將佢收歸期下。 能夠勝任前鋒、翼鋒、攻中多個中前場位置的法比奧卡華路出身於富咸青訓系統。此子今季於英冠為富咸攻入11球及交出8次助攻,成功帶領呢支老牌球會奪走英冠冠軍並取得重回英超賽場的資格。 雖然法比奧卡華路為約滿離隊加盟利物浦,但據知紅軍亦都會付出的500萬鎊作為培育費,並有價值270萬鎊附帶條款。而且他日若利物浦將其轉售,富咸將獲得的20%轉會費。

維拉宣布免簽法國年輕中場卡馬拉

阿士東維拉於今日(23日)宣布從法國馬賽免費簽入年僅22歲新晉法國國腳卡馬拉。能夠擔任防守中場及中堅的此子早前曾盛傳備受曼聯及巴塞隆拿等大球會關注,最終阿士東維拉成功將呢位法國新星收為旗下,雙方將簽約五年。 卡馬拉雖然年僅22歲,但已經為法甲球隊馬賽上陣超過一百場。此子今季為馬賽披甲34場入1球,表現穩定令佢成功獲得法國國家隊垂青,獲徵召成為大國腳。 阿士東維拉領隊謝拉特表示非常高興可以吸引到呢位歐洲球壇最有潛力嘅中場之一加盟,球隊未來將會以呢位法國中場為核心繼續發展,繼續加強球隊嘅競爭力。

五分鐘內連入三球 曼城反勝維拉3比2奪得英超冠軍

英超於昨日(22日)煞科,曼城於主場對阿士東維拉一度落後兩球的情況下,憑根度簡梅開二度和洛迪的入球,成功反勝3:2奪得英超冠軍,近五季英超第四度封王。 曼城五分鐘內連入三球奪英超 作客的維拉憑右後衛卡殊禁區內頭槌搶點成功頂入,爆冷先開紀錄曼城1:0。禍不單行,曾效力利物浦的巴西中場古天奴接應屈堅斯頭槌二傳後禁區邊一抽入網,曼城落後至2:0。不過,曼城突然於五分鐘內憑根度簡連入兩球及洛迪卡斯簡迪的入球,成功反超3:2至完場。賽後曼城38戰29勝6和3負得93分,成功以分之差力壓利物浦奪得英超冠軍。 利物浦贏波但無助奪冠 另一邊廂,利物浦於主場雖然以3:1成功擊敗狼隊,可惜由於曼城成功反勝維垃,梗能夠以92分奪得第二。 必需取勝才有機會奪得英超的紅軍開賽三分鐘就先被狼隊的柏度尼圖攻破大門,落後0:1。不過不久之後利物浦就憑著前鋒沙迪奧文尼接應堤亞高艾簡達拿妙傳單刀射入成功追平比分。及後利物浦更憑沙拿及羅拔臣的入球反超前,最終以3:1擊敗對手。賽後沙拿憑23個聯賽入球與熱刺的孫興民並列射手榜榜首。 列斯聯二比一贏賓福特護級成功 護級方面,列斯聯作客憑着夏芬及積夏利遜的入球,以2:1 贏賓福特,成功以38分反壓主場1:2不敵紐卡素的般尼成功護級,後者則跌落尾三需要降班。

利物浦作客反勝二比一修咸頓 成功力保爭標希望

利物浦在英超作客修咸頓,派遣多個後備上陣的利物浦於先輸一球下的情況下連入兩球反勝修咸頓,賽後與榜首的曼城收窄至1分差距,延續爭標希望。 「紅軍」主力沙拿及雲迪克均因傷缺陣, 球隊於大量輪換的情況下成為先失球的一方。13分鐘,修咸頓翼鋒列特文左路起腳射入成功為主隊先開紀錄。及後利物浦反撲,今季聯賽首次獲正選的南野拓實在禁區內接應二傳後勁射破網成功為 「紅軍」扳平。 「紅軍」 更於67分鐘由中堅麥迪比頂入反超前的入球,最終利物浦以2:1反勝全取3分,成功將奪冠希望保留到最後一輪比賽。 最後一輪英超將於下周日(22日)舉行,屆時利物浦將會面對狼隊,另一方面佢地英超冠軍嘅競爭對手曼城就將會面對阿士東維拉。

又少一個球場喇 沙田一億工程拆走球場建41層「插針樓」

星期二(5月17日),沙田民政事務處及房屋署向沙田區議會提交文件,提出將大圍遊樂場,改建成一幢「插針式」嘅41層政府聯用綜合大樓同埋資助房屋,預料提供到400個單位,合共1000人居住。到時綜合大樓將會設有小型圖書館、普通科門診、長者中心等一系列配套設施。發展項目預計最快喺2024年展開,最快2030年竣工。

大埔足球會舉辦嘅成人足球體驗日 6月6日可以同球員同場訓練

想體驗下甲組球員嘅訓練?機會嚟啦飛雲! 坐擁多位前港超球員包括安基斯、張志勇及方栢倫的甲組球隊大埔足球會將會於6月6日(一)舉辦嘅成人足球體驗日。屆時可以體驗一下同甲組教練同埋球員訓練等足球運動。

獅子會及足總合辦五人足球比賽 仲有三日就截止報名喇

隨着呢段日子想簡簡單單踢場波都真係唔易,難得球場重新開放,有興趣組隊比賽嘅不妨試吓呢個五人足球賽,今次仲設有女子組㗎。記得留意得翻三日時間報名咋! 由國際獅子總會中國港澳三O三區獅子會同民政事務總署主辦,香港足球總會及獅子會足球隊協辦嘅『全港青少年五人足球比賽2022』將會喺今年6月3日同6月19日舉行。 男子組設有U10、U12及U14組別。女子組設有U10、U12及U18組別。男女子混合組 設有U8組別。 報名網頁:https://www.303lionssoccer.org/5on5 截止報名日期: 2022年5月15日 (星期日) 比賽日期及時間: 2022年6月3日(星期五)上午九時至下午六時                               2022年6月19日(星期日)上午九時至下午六時 擬定比賽場地: 寶翠公園十一人人造草地足球場 報名費用: 每隊HK$200 獎項及獎品: 每組盃賽均設冠、亞、季及殿軍,                       各得獎隊伍可得獎盃乙個,                       得獎隊伍成員可獲獎牌乙枚。                       冠軍隊伍成員更可獲贈一套紀念球衣及足球乙個。 每隊報名人數: 5-10 人
比賽形式:單循環制 重要備註:如比賽因疫情影響需改期舉行,大會將另行通知各參加隊伍。

如有問題,歡迎致電/Whatsapp 5502 1537 / 9103 1197查詢有關詳情。 * * * * * * 注意: * * 疫苗接種:
為保障公眾健康,所有 18 歲或以上參加者必須在比賽日期前完 成接種 2 劑新冠疫苗;12 至 17 歲的參加者只需完成接種一劑 新冠疫苗。參加者必須完成疫苗接種最少 14 天,及提供完成新 冠疫苗接種的證明。12 歲以下參加者亦需要提供 72 小時內核 酸檢測陰性結果證明。大會會因應政府最新公布的疫苗接種安 排而修訂上述規定,屆時將另行通知。如未能符合上述要求, 大會有權不接受其報名或取消其參賽資格。 * 防疫措施:
進入康文署轄下足球場時,除 65 歲以上的長者及 12 歲以下的 兒童外,所有進場人士須利用手機上的「安心出行」流動應用 程式掃描「安心出行」場所二維碼,並須量度體温。65 歲以上 的長者及 12 歲以下的兒童或特別理由的其他人士,須到場地辦 事處登記個人資料,及核對身份證及電話號碼。領隊應預先通 知大會非使用「安心出行」的進場人士人數,方便大會預早通 知康文署。除進行隊際運動外,每一小組不得超過 4 人。觀眾 席不得超過座位數目的 85%;同一行座椅中不可有連續超過 6 張座椅被佔用。以上規定將以政府最新公布為準。

兩大業餘七人足球聯賽招收新球隊 報名費1500仲包埋錄影同精華剪輯

隨着政府早前放寬社交距離措施,重新開放球場以及豁免市民做運動時戴口罩,大家都終於可以重返球場重新投入足球嘅懷抱喇!與此同時,兩個於香港業餘足球聯賽CJ7 及UT League 亦都宣布將會為其聯賽招收新球隊,有興趣於工餘時享受一下踢聯賽嘅樂趣嘅波友記得留意喇! UT League平日聯賽 草地及石地均接受報名 於2019年成立的UT League 早前宣布將會增加兩個七人平日聯賽,分別為七人平日草地足球聯賽及七人平日迎新聯賽。兩個聯賽都將會於六月開始,並會以單循環形式進行。 UT七人平日草地足球聯賽 聯賽形式 單循環制 比賽場次 9場 比賽時間 星期一至星期五 9:00pm - 11:00pm 註冊球員限額 22人 報名費用 $6500* UT七人平日迎新聯賽 聯賽形式 單循環制 比賽場次 9場 比賽時間 星期一至星期五 9:00pm - 11:00pm 註冊球員限額 30人 報名費用 $1500* 如有興趣,歡迎於賽會instagram 帳戶或WhatsApp 至 95427889報名或查詢 CJ七人石地足球迎新聯賽開始接受報名 參與旗下聯賽球隊超過200隊的本地業餘聯賽CJ 7亦都宣布旗下迎新聯賽將會接受新球隊報名。迎新聯賽賽季將於今年七月開始,並採取單循環形式進行。 CJ迎新聯賽2022 聯賽形式 單循環制 比賽場次 9場 比賽時間 星期一至星期五 9:00pm - 11:00pm 註冊球員限額 20人 報名費用 $1500* *費用已包比賽錄影、精華剪輯及場地安排。 如有興趣,歡迎WhatsApp 至 ⁨9788 4620報名查詢

九龍木球會公布選拔日詳情 8月2及9及16日於京士柏舉行

早前同我哋合作嘅九龍木球會終於喺較早之前終於公布佢哋新球季選拔嘅詳情啦! 佢哋將會喺8月2日、8月9日及8月16日下午九點喺京士柏甄選未來一個新球季有興趣加入嘅球員。

西貢足球隊招人啦 7月31日舉行選拔日

如果你住喺西貢/喺西貢區做緊嘢,又想代表西貢踢比賽嘅話,機會嚟喇! 西貢足球會將會喺嚟緊嘅星期六,舉行球員選拔日,為未來一個新球季招募新力軍加入。 選拔詳情如下: 日期📅:2021年7月31日 (六)

甲組深水埗8月1日舉行球員選拔 招募u22球員及青年軍

覺得自己好好波,有能力踢到甲組嘅你機會嚟喇!甲組球會深水埗宣布將於8月1日(日)舉行球員選拔,為未來一個新球季招募u22球員及青年軍。 選拔詳情如下: 日期📅:2021年8月1日 (日)

首飾萊比錫正式登陸搵腳 為未來新球季招募U22球員

又有一支丙組球會登陸搵腳喇😍😍 上年丙組勇奪第五名嘅首飾萊比錫將會係我地平台為未來一個新球季招募u22 球員! 球會已經安排於18/7 晚上八時於大埔廣福進行選拔,興趣嘅朋友記得上搵腳申請,並於當日自行攜帶裝備,提早30分鐘同球會報到喇!💪🏻💪🏻

傑志足球學院選拔接受報名喇 各年齡組別梯隊均可報名

各位青年球員上個月睇住傑志一眾自家青訓球員如陳晉一、鄭展龍、安永佳及羅梓駿喺亞冠盃舞台上表現自己,有冇幻想過自己可以複製佢哋嘅足球之路,係亞冠嘅舞台上發光發亮呢?咁你就唔可以錯過傑志足球學院今次嘅選拔喇! 港超班霸傑志旗下足球學校-傑志足球學院宣布將會於六月至七月為各年齡組別梯隊舉行球員選拔,並由即日起開始接受青少年球員報名。

理文青訓學院宣布將為2022至23年度招生 7月首個週末公布更多詳情

想踢港超?想接受榮獲「亞洲足協菁英計劃」一星認證的足球青訓學校的訓練?有機會喇,港超球會理文旗下的理文青訓學院宣布為各梯隊招募2022/23年度新生,招募組別包括: • [ U18 ] 2005 & 2006 年出生 • [ U16 ] 2007 & 2008 年出生 • [ U14 ] 2009 & 2010 年出生 • [ U12 ] 2011 & 2012 年出生 • [ U10 ] 2013 年出生 • [ U9 / U8 ] 2014 / 2015 年出生 理文青訓學院新生招募營將於7月舉辦 理文青訓學院表示新生招募營將於今年7月舉辦,更多詳情將會會在7月首個週末公布。 新生除了需出席招募營外,還需要隨隊訓練約3-4星期,然後才開始正式季前訓練。期間,青訓學院的教職員會觀察新生表現,以評估他們是否適合此訓練計劃。成功通過評估的新生就可以加入理文青年梯隊,接受專業嘅訓練喇! 理文青訓學院「亞洲足協菁英計劃」一星認證 理文青訓學院於上年度向香港足球總會及亞洲足協提交評級申請,並於今年三月接獲亞洲足協頒發一星認證,是繼傑志之後,香港第二個獲得該評級的青訓學院。 「亞洲足協菁英計劃」的評級標準涵蓋多個範疇,包括教練師資、發展計劃、訓練設施等等。 想成為理文一份子?就要盡快註冊啦* https://forms.gle/28Tu2zsjX8v2vJL27 ***舊生不需註冊

足總舉辦青苗訓練計劃第三期開始接受報名 歡迎4至11歲嘅小朋友參加

足總為了令更多小朋友有機嘗試接觸足球並引起他們對足球的熱情而舉辦的「中銀香港港超青苗訓練計劃」第三期已經於日前開始接受報名啦! 是次訓練計劃將會分為進階訓練班、恆常訓練班及守門員訓練班。 恆常訓練班 時間 詳情請參閱訓練時間表 地點 於各不同地區舉行,詳情請參閱訓練時間表 參加費用 港幣800元 進階訓練班 時間 星期六下午4時30分至6時正 地點 賽馬會香港足球總會足球訓練中心仿真草4號足球場 參加費用 港幣1,2002 守門員訓練班1 時間 詳情請參閱訓練時間表 地點 跑馬地遊樂場 參加費用 港幣800元2如果小朋友有興趣參與計劃,可以透過足總提供嘅 網上報名表格 報名參加。 另外,為了推廣女子足球,足總更推出「推動女子足球優惠」。凡有小朋友參加訓練班恆常訓練班或進階訓練班),其小朋友之姐姐或妹妹亦都可以免費參加。 詳情請參考 足總網頁

大埔女子足球隊舉辦招募日 招募U18及U15級別球員

好耐冇球員招募/選拔嘅新聞啦,大埔女子足球隊宣布將會於嚟緊嘅5月7日(星期六)舉辦球員招募日,為18歲以下及15歲以下級別青年軍招募球員。招募日將會係晚上六時半至八時於石硤尾公園足球場舉行。 日期:2022年5月7日(星期六) 時間:6:30pm - 8:00pm 地點:石硤尾人造草足球場 招募對象: U18組別(2005年1月1日後出生) U15組別(2008年1月1日前出生) 有興趣進入球隊接受專業嘅訓練嘅小球員,可以預先填好登記表格,並於招募日當日準時出席即可! 如有其他問題,歡迎到大埔女子足球隊專業查詢。

「港足吶喊」新一期明天起免費派發 港九新界均有派發地點

由一班熱愛香港本地足球嘅球迷成立,標榜「專講本地波」嘅雜誌「港足吶喊」宣布將會於明日(7日)起開始免費派發最新一期(第十一期)的實體版雜誌。本期雜誌將會於全港九新界均有派發點,詳情可看以下列表。 派發點列表: 港島 灣仔: 1. 七分一集成-集成中心商場G2B號 2. 艺鵠-灣仔軒尼詩道365-367號富德樓 西環 舍下-香港西環保德街27號地下 九龍 旺角: 序言-旺角西洋菜南街68號號 7F 界限書店-旺角彌敦道580G號彌敦中心10樓04室 閲讀時代-太子道西162號華邦商業中心1102室 Kitroom-旺角窩打老道53-55號匯達中心3樓A室 Superfans-旺角西洋菜南街5號好望角大廈20樓03室 Atacar-旺角上海街438-444號同珍商業中心22樓01-02室 深水埗: 獵人書店-深水埗黃竹街1c地舖 (試業中) 甜一刻-深水埗福榮街218號美居中心62號舖地下 一拳書館-深水埗大南街169-171號大南商業大廈3樓 觀塘: Mellow Out 夕拾 x 閒社-觀塘駿業街60號14A駿運工業大廈 土瓜灣: Urban Space-土瓜灣美景街45號 新界 粉嶺 添仔蝦餃-粉嶺和滿街新界熟食中心2樓 12及19號鋪 大埔 解憂舊書店-新界大埔寶湖道街市F021 屯門 牛雜-屯門匯賢一號2501 荃灣 一瓢書店-荃灣沙咀道11號達貿中心305室 港足吶喊表示是次派發將每人限取一本。作為香港買少見少的實體本土足球雜誌,仲要免費派發,大家記得多多支持,拎一本返去睇下吖!

本地足球品牌SUBERAHK推出場地重開優惠 訂球衣送和風鞋袋

本地足球品牌SUBERAHK宣布推出限時優惠,凡於2022年4月21日至5月20日期間,訂購熱昇華組隊球衣滿10件,可獲送贈和風鞋袋 10個。 是次優惠數量有限,送完即止。如果各位波友諗住整組隊球衣,不妨考慮吓佢哋呀! Subera 球衣優惠 href=“https://bit.ly/2ZEMsPV”

身為「本地」足球媒體 對香港足球係咪應該有一份責任?

話說不久之前傑志就成功係亞冠盃取得第二場勝仗,晉級機會可以話係近在咫尺,對於香港足球嚟講,都可以話係非常鼓舞嘅一件事。不過見到友媒於賽後出左一篇關於報道香港足球媒體嘅文章,睇完有啲感覺,就想寫篇嘢講吓。 帶返個頭盔先,老實講,小編其實並唔係一個做媒體出身嘅人,亦都冇讀過任何媒體相關的學位/課程。不過係我嘅認知中,身為一個本地媒體,應該要背負住推廣同傳承本土文化嘅責任喺度。 咁將呢樣嘢套用返係足球會睇上面嘅話,我哋亦都可以理解為媒體係有責任去報道及推廣香港足球。可是有啲多followers嘅足球偏偏對香港足球不聞不問,甚至淨係報憂不報喜。最諷刺嘅係,呢啲咁樣嘅足球媒體/專頁,有啲仲夠膽係簡介介紹自己為「最本地化」的足球媒體/專頁。身為「最本地化」的媒體但係一篇本地球壇甚至香港足球代表隊嘅報道都冇,日日淨係喺度講英超歐聯,到底你哋點解會好意思話自己係「最本地化」? 可能會有人為佢哋辯解,因為講本地波冇人like嘛,冇熱度咪唔寫囉。但係有冇諗過歸根究底,話題熱度係靠多人講多人討論先會有。你唔講,我唔講,冇人報道冇討論度,咪自然冇人睇囉。如果各位足球媒體可以講外國波以外,可以報多少少本地足球嘅新聞,增加本地波嘅曝光率,香港足球一定可以更加茁壯地成長。始終一個聯賽/球隊可以搵到幾多商業贊助,同佢本身嘅曝光率一定有關。 香港足球一直有一小部份人/專頁喺度默默努力報道緊,不過呢少部份人/專頁嘅影響力一定冇嗰啲大型嘅、專業嘅咁多。有一句說話叫做「能力越大責任越大」,希望呢啲「有能力」嘅足球專頁/媒體可以負起佢哋嘅責任,對本地足球再做多啲。同時亦都希望支持本地波大家可以多啲follow同埋支持一啲報導本地波足球專頁/媒體,令到其他媒體可以明白到原來講本地波,係會有人睇有人like 㗎。

新功能「名單分類」 更容易整理候選名單

各位領隊係組隊嘅時候會唔會覺得招募越嚟越多人個陣,好難分候選名單入面邊啲球員已經加入左球隊,邊啲球員仲等緊試腳呢? 我地明白你哋嘅煩惱,所以搵腳已經推出左新功能「名單分類」,咁你更加容易整理你嘅球員名單。即刻睇吓呢篇文,睇吓點樣呢個新功能啦!

關於我們

|

聯絡我們

|

私隱條款

|

條款及細則

©2020 搵腳, 保留所有權利